"انگریز ءِ بمب"

عبدالحلیم حیاتان 

اے اَکس من ءُ عطاء حیدر ءَ نومبر 2013 ءَ دیمی زِر ءِ لَمب ءَ کش اِتَگ آں۔ آ زمانگ ءَ سی پیک دگ جوڈ نہ بیتگ۔ گڑا من ءُ عطاء مدام بیگاھانی وھد ءَ دریا ءِ لمب ءَ واک کنان ءَ دیم پہ ڈھوریہ ءَ کسٹم ءِ کِرا شُتگ اِیں۔ 2013 ءِ زمانگ ءَ دیمی زِر ءِ لمب ءَ یک بمبے بزاں (Pole) ءِ نشانی ءِ ہم بیتگ کہ اِشی ءِ نام مَردماں "انگریز ءِ بمب" ایر کُتگ اَت۔ یک زمانگے ہمے بمب سلامت بیتگ۔ 

عطاء کسہ کَنت کہ "اے بمب ءِ چار پادگ بیتگ آں ءُ اِشی ءِ میان ءَ یک آسن ءِ پٹی یے ھم بیتگ کہ مَردم ہمے بمب ءِ سَر ءَ لِک کپتگ آں ءُ آیاں دریا ءِ آپ ءَ جمپ جَتگ ءُ گُوش کُتَگ۔ عطاء گُشیت کہ دیمی زِر ءَ اے وڑیں بمب دو بیتگاں“ ۔" 

ناھدا کاکا عطاء اللہ گَپ کَنت کہ "وھد ءُ زمانگ ءَ ہمے بمب ءِ سَر ءَ یک میٹرے ہم جَنُوک بیتگ کہ اِشی ءِ چار ءُ ٹپاس ءِ واستا یک چوکیدارے داشتگ ئے کہ آئی نام حیدر بیتگ ہمے چوکیدار گْوادر ءِ جَھمِنند بیتگ۔" 

گْوادر ءَ چی سیادی داروکیں ادیب ءُ کتاب ”باتیل ءِ ساھیگ ءِ“ نبشتہ کار ماسٹر حسن علی سہیل گُوشیت کہ ”اے بمب ھفتاد (70) ءِ دھک ءَ جوڈ کَنگ بیتگ۔ آئی ءِ برات یونس ہمے بمب ءِ محکمہ ءِ کاردار بیتگ۔ بمب ءَ میٹرے پِر بیتگ ءُ میٹر ءَ چی دریا ءِ آپ ءِ کیل ءُ کساس نوٹ کَنگ بیتَگ آں“۔ 

ما کہ سَر چِست کُتگ گڑا ہمے انگریز ءِ بمب نِزور تراِتَگ اَت۔ پدا روچ پہ روچ ھلاس بیان بیت۔ نی دیمی زِر ءَ سی پیک ءِ اژدھا اِیں دگے بستگ اِت زانگ نہ بیت کہ ہمے بمب ءِ نشانی “باقیات“ پَش کپتگ آں یا کہ اِناں؟

بلے اے بمب ءِ باروا اے معلوم داری نہ رست کہ اِشی ءِ نام چیا ”انگریز ءِ بمب“ ایر کُرتگ اِت۔ لہتیں گُوشیت کہ اے بمب محکمہ اوشینو گرافی ءَ بَستگ۔ البت اے بمب ءِ باروا پَٹ ءُ پول کَنگ بہ بیت بلکیں گیشیں معلوم داری دیم ءَ بئیت۔

2013 ءَ کہ ما اے اَکس گیپت اَنت گڑا فیس بُک ءَ شِنگ کُرتاں کہ یات گار بہ بَنت۔ فیس بُک ءَ کہ چیزے share کَن ئے گڑا بیھال نہ بیت۔ ما واہ بیھال اِت اِیں بلے فیس بک ءَ پد ءَ مارا گوست ءِ یات پرینت آں، گڑا دل ءَ گُشت کہ چیز ءِ ہمے باروا بہ نویس ءُ پد ءَ فیس بک ءَ شِنگ بکن کہ گْوادر ءِ اے گوست پد ءَ گیر آرگ بہ بیت۔

او! گْوادر تو گُش ئے گوست ءِ کسہ یے جوڈ بوھان ئے باریں داں کُجا سر بئے۔ 

"گْوادر تئی گْوادر منی بُرز تِر بہ بات سَر تئی"