سپر ءِ اھوال
عبدالحلیم حیاتان
گْوادر گرم اَت لین ھم شوک نہ اِتاں۔ توپانیں گرم ءَ چہ وتارا رکّینَگ ءِ ھاتر ءَ دِل ھُلّ کُت کہ گوں سنگتاں پاکستان ءِ گوریچانی ءُ سارت اِیں دمگانی تَر ءُ تاب ءَ برواں ۔ ما چہ گْوادر ءَ جولائی ءِ 10 تاریخ ءَ وتی سپر ءِ بندات کُرت۔ مئے اولی بُنجَل بلوچستان ءِ مزن شھر شال اَت۔ دومی روچ ءَ ما پہ اسلام آباد ءِ سپر دَر کپتیں۔ شال ءَ بگر تا اسلام آباد ءَ مئے سپر ”Sleeping Bus“ گوما بُوتگ ءَ۔ اے اولی بَر اَت کہ من ءُ مئے گیشتراِیں سَنگت ”Sleeping Bus“ ءِ سپراِتیں۔ کساس 18 کلاکانی ءَ سپر ءَ رَند ما ھاکمانی شھر اسلام آباد ءَ سَربیت اِیں۔ بلے 18 کلاکانی سپر ءَ ما بقول ءِ اے بی دشتی ءِ ئیگ ءَ "سُچ مُچ" نبیت اِیں۔ بزاں کہ دَم نہ بُرت۔ اے ہمے ”Sleeping Bus“ ءِ کمال اَت۔ ”Sleeping Bus“ ءِ نَول بزاں کہ کرایہ 5000 کلدار اِنت۔
اسلام آباد ءَ یک شپے جَلّگ ءَ پَد مئے سپر کے پی کے ءِ گوریچانی دَمگانی واست ءَ بندات بیت۔ مئے اولی بُنجل “بحرین” شھر اَت۔ شپ ءَ عشا ءِ وھد ءُ پاساں ما بحرین ءَ سَر بیتیں ۔ ھَور نرم نرم ءَ گوارگ اَت۔ موسم سارت اَت کہ جبین ءَ پُتِرت۔ ما لَرزینگ ءَ لَگّ اِتیں۔ چہ گرمیں موسم ءُ مولُم ءَ چہ درآیگ ءُ بحرین ءِ سارتی ءِ مارَگ ءَ پَد ما توپانیں گرم ءِ سَکیاں گوشے شمُوش کار بیتیں۔
ھوٹلے بُک کُرت۔ ھوٹل کور ءِ لمب ءَ اَت۔ شَپ اَت تچُوکیں کور ءِ توار اَت۔ گمان بُوھَگ اَت کہ کور شپ ءُ ماہ ءُ اِستاراں گوں ساز ءُ چَنگ ءُ رباب اَت۔ سُھب ءَ بحرین ءِ زیبائی ءِ چَارگ ءَ درکپتیں۔ بحرین ءِ دو نیمگ ءَ بُرزیں کوہ اَنت۔ اے کوہ سنگ ئیگ اَتاں بلے سبز ءُ میزران اِتاں۔ بُرزی نیمگ ءَ چہ دگہ یَک کورے جھلاد اِنت۔ تچُوکیں کور ءَ روچ ءَ ھم وتی الھان اَت گوشے کہ پہ بحرین ءِ آیوکیں سیل ءُ سوادیاں وَش اتکی ءِ سوت جَنگ ءَ اَت۔ادا کورانی آپ چو شیشَگ ءَ ساپ اِنت ءُ سارت اِنت ۔ آپ ءَ کہ دست بجن ئے دست چو برپ ءَ بَنت۔
بحرین (Behrain) سوات ھمے کَور ءِ روچ دَراتکی نیمگ اِنت۔ اے سیل ءُ سوادی جاگہ ءَ پمشکہ بحرین گُوشَنت کہ اِد ءَ دو کَور ھوار بیت۔ یَکے ءَ ”سوات“ ءِ کور گُش انت دومی ءَ ”دارال“ ءِ کَور گُش انت۔ عربی زُبان ءَ ”بحر“ دریا یا کَور ءَ گُشَ انت۔ بحرین بزاں کہ دو کَور۔ چہ دو کورانی ھوار بُوھگ ءَ اے شھر ءِ نام بحرین ءِ نام ءَ رواج گِیپتَگ۔ بحرین ءِ بُرزی چہ "seal level" ءَ 4500 فُٹ اِنت۔ اسلام آباد ءَ چہ بحرین شھر ءِ زمینی فاصلہ کِساس (293) کلومیٹر بیت۔
بحرین ءِ مَردُم تورالی زُبان ءَ گَپ کَن اَنت۔ ویکیپیڈیا ءِ رِد ءَ اے وھد ءَ تورالی زُبان ءَ گَپ کنُوکیں مَردُمانی کَچ یک لکھ ءُ پنجاہ ھزار (150000) بیت۔ تورالی زُبان تنیگہ برجاہ اِنت بلے اے زُبان چو دُگنیا ءِ دگہ کم پَش کَپتَگیں زُبانانی وڑ ءَ ھلاس بیگ ءِ جاور ھالانی دیمپان اِنت۔ کے پی کے اے شھر پہ سیل ءُ سواد ءَ یک جلواناکیں شھر یے۔ کورانی لَمب ءُ سبزیں کوھانی میانجی ءَ اے شھر ءِ ندارگ سَک زیبناک اِنت ۔ بحرین ءِ مولُم گرماگ ءِ ماہاں سَک وش اِنت ۔ شپ ئے سارت اَنت ءُ سُھب ءَ پہ جان ءِ شُودگ ءَ گرمیں آپ ءِ ضلُورَت کَپ اِیت۔
بحرین ءِ ندارگانی سیل ءُ سواد ءَ پَد مئے سپر دگہ یک زیبائیں شھرے کہ نام ئے ”کالام“ اِنت پہ آئی ءَ بِندات بیت۔ بحرین ءُ کالام ءِ زمینی فاصلہ کساس (38) کلومیٹر اِنت بلے دَگ ءِ بازیں جاگہاں نہ وَش اِنت۔ پُروشت ءُ پُروش ءِ آماچ اِنت۔ دو کلاکانی سپر ءَ رَند ما کالام ءَ سَر بیتیں ۔ کالام ھم چو بحرین ءِ وَڑ ءَ وتی زیبائی ءَ درشان کنان اَت۔ جھل ءَ کَور تچَگ اِنت۔ بُرز ءَ ھوٹل ءُ بازار اِنت۔ کور ءِ لمب ءَ دکان اَنت۔ کور ءِ آپ ءِ تھا تھت جَتَگ۔ تھتانی سر ءَ مَردُم نِنداَنت ءُ گوں سارتیں آپ ءَ وَشنود بَنت۔ کوھانی سر ءَ جمبر ءُ بَرپ اَت۔ جمبر گوں کوھاں لیب اِتاں۔ اناگہ نود شَنزان بُوت پَد ءَ بشی کُوکراں دِلے میل ءَ گورت۔ سارتی ءَ وتی بانزُل اِیر داتاں۔ شَپ ءَ پَد ءَ ھَور ءَ گُورت۔ کالام ءِ بُرزی چہ ”Seal Level“ ءَ 6800 فُٹ اِنت۔
کالام بازار ءِ دومی نیمگ ءَ کور ءِ آ دَست ءَ یک کوھنیں مسیتے ھم اَست کہ اے مسیت ءِ نام ”مسجدِ امام“ اِنت۔ اے مسیت دو طبق ئیگ اِنت ۔ مسیت گوں دار ءَ جوڈ کَنگ بُوتگ۔ اے مسیت ءِ اُمر کساس سہ سَد (300) سال ءَ چہ گِیش بیت۔ مسیت ءِ دَروازگ نقش ءُ نگار اَنت کہ ہمے ھند ءِ دود ءُ ربیدَگ ءِ پجار ءَ کَن اَنت۔ کالام ھم سوات کَور ءِ لمب ءَ اِنت۔
کالام ءِ زیبائی ءُ اِشی ءِ نِدارگ چماں تاھیر دَینت۔ کالام ءِ چہ دگہ دَگ ءِ بُرزی نِیمگ ءَ پہ کسان کسانیں سیل ءُ سوادی جاگہاں روت۔ اے سیل ءُ سوادی جاگہ قدرت ءَ پہ وَڑ ءُ پیم جوڈ کُرتَگ اَنت ۔ سبز ءُ میزر اَنت۔ داں چَم کار کَن اَنت سبزیں کاہ گِندگ ءَ کئیت۔ گوشے یکے ءَ قالینے پَچ کُرتَگ۔ جنگل چہ درچکاں پُراَنت۔ کوہ میزران اَنت۔ آخروٹ ءُ دگہ نَیبگ ءُ میوہانی درچک بے کساس ءَ اَست۔ دَگ ءِ جھلی نیمگ ءَ کور ءِ تچُوکیں آپ اِنت۔ کوہ اَنت کہ چہ سبزی ءَ جلوانک اَنت۔ ہوٹل ءُ دکان اِنت۔ سیل ءُ سواد کنُوکانی مُچی اِنت۔ کسان چہ مزن ابرم ءِ زیبائی ءَ گوں وَشنود بُوھان اَنت ۔ ھَور نرم نرم ءَ شَنزگ اَت۔ جمبری کوکر ءُ اِستین گوں کوہاں ھم دپ اِتاں۔ ابرم ءِ اے زیبائی گِیمُرتَگیں دِلاں بُود پرمائیت
بحرین ءُ کالام ءِ سپر ءَ لھتیں چیز ما نوٹ کُرتگ اَت کہ اِد ءَ گران نھادی باز اِنت۔ ورگ ءُ وَردنی چیزاں بِگر تا ھوٹلانی کرایہ سَگ گِران اِنت۔ سِیل ءُ سوادی جاگھاں چونائی ءَ گران نھادی باز بیت بلے پاکستان ءِ سیل ءُ سوادی جاگہاں گُشے زاناں پوست ءَ کَش اَنت ۔ مڈل کلاس ءِ مَردمانی واست ءَ پاکستان ءِ گوریچانی سیل ءُ سوادی جاگہانی تَر ءُ تاب چہ گیشیں گِران نھادی ءِ سبب ءَ ارزان نہ اِنت۔ دگہ گپے اِش اِنت کہ اِد ءَ سپائی ءِ جاور ھال ھم جوان نہ اِنت۔ سیل ءُ سوادی جاگہ بائدیں ساپ ءُ پَلگار بہ بنت بلے چوش نہ اِنت۔
ناکہ سرکار ءَ پہ اے سیل ءُ سوادی جاگہانی واست ءَ وتی دِلگوش گُور کُرتَگ ناکہ سیل ءُ سواد کنُوکیں مَردم اِشی ءِ ھیال ءَ دارَنت۔ پہ سیل ءُ سواد ءُ تَرگ ءَ کے پی کے ءِ گوریچانی دمگ شَراَنت۔ پرچاکہ اِد ءِ موسم ءُ نِدارگ ترا مُلمہ کَن اَنت بلے یک چیزے اَست کہ اے چو ڈنی مُلکانی سیل ءُ سوادی جاگہانی وڈ ءَ ساپ ءُ پَلگار نہ ینت۔ سال 2022 ءَ کہ ما ایران ءِ گوریچانی دَمگانی تَر ءُ تاب کُرتگ اَت گوڑا ما دیست کہ ایران ءِ ھکومت ءَ وتی سیل ءُ سوادی جاگہ شریں وَڑے ءَ دیمرئی داتگ اَنت ، بلے پاکستان ءِ سیل ءُ سوادی جاگہاں ھکومتی دِلگوشی گِندگ ءَ نئیت۔
اگاں کسے کے پی کے ءِ سیل ءُ سوادی جاگہانی تَر ءُ تاب ءَ ھُدوناک اِنت یا دِل ئے ھُل کَنت گوڑا آ گران نھادی، موسم ءُ مولُمانی ہمرائی ءَ دَگانی ھال ءَ بہ گِیپت۔ مئے سپر ءِ وھد ءَ موسم ءُ مولُم جوان اِتاں۔ بلے اِد ءِ موسم ءَ بیسہ نیست کدی ھم کَور ھار کن اَنت۔ چہ کوھاں ءَ سِنگ جھلا کَپ اَنت بزاں "Land Slidding" بیت کہ چریشی ءَ دَگ بَند بُوت کَن اَنت۔ اے سارتیں جاگہ اَنت ھاس کر شپاں موسم سارت بیت پہ وَت ءَ کوٹ ءُ بُوٹ ھم اَلم ءَ بیار اِت ۔
Comments
Post a Comment