سالونک بانور ءِ ادیرہ؟
عبدالحلیم حیاتان
گْوادر کرکٹ اسٹیڈیم ءِ قبلی نیمَگ کبرستان ءَ یک کوھنیں ءُ کدیمی ادیرہ اَست کہ اشی ءِ تھا سئے مانش مان اِنت۔ باز ھَندی مردم گوش اِنت کہ اے سالونک ءُ بانور ءِ مانشاں۔
انچو گُشنت سالونک ءُ بانور گْوادر ءِ بُنکی مردم بیتگاں۔ بانور یک شررنگیں جِنک ءِ بیتَگ کہ کہدہ ءَ ہمے جنک ءِ واست ءَ وتی بَچک ءِ ھبر برتَگ بلے جِنک ءِ مات ءَ گوشتَگ کہ آئی ءِ چُک ءَ پیسر ءَ دِشتارے اَست پمشکہ کہدہ چُک ءِ ھبر نہ ٹہیتَگ۔ جِنک گوں وتی نامیتگیں دشتار ءَ آروس کَنت۔
آروس ءِ شپ ءَ پندل سازگ بیت، سالونک ءُ بانور ءِ شیرانی تھا زہر مان کنَگ بیتَگ کہ شیرانی ورگ ءَ پد سالونک، بانور ءُ دیمدار یکجا مراِنت ءُ یکیں ادیرہ ءِ تھا کل کنَگ بنت۔
بلے لہتیں مردماں پٹ ءُ پول کُرتگ کہ اے کسہ وت ساچیں کسہ ءِ۔ اے ادیرہ سالونک ءُ بانورانی نینت۔
آیانی گوشگ اِنت کہ ادیرہ ملا امیر کمبر نامیں مرد ءِ گینت۔ ادیرہ ءِ تھا دو مانشانی باروا گُشنت کہ بگندے یکیں روچ ءَ دو مردم بیران بیتَگ یا کہ ساری ءَ دگہ مانش ءِ ہمے ٹِک ءَ موجود بیتَگ۔ پٹ ءُ پول کنوکاں سالونک ءُ بانور ءِ ادیرہ بُوھگ ءِ گپ رَد کُرتگ۔
"کازی ریحان ءَ وتی یک نبشتانک ءِ تھا نِبیس اِتگ کہ مانش ءِ شک ءِ سر ءَ نبشتہ بیتگ کہ اے جاہ ھوت میران ءَ پہ ملا امیر کمبر ءَ رمس شعبان دو شمبے روچ سال 1140 (ھجری قمری) شے بلال ءِ بادشاھی ءِ آسر ءَ جوڈ کُرتگ۔
کازی نبشتہ کَنت کہ بیت کنت سئے ئیں مردم یکیں روچ ءَ بیران بیتگ اَنت پر چاکہ ادیرہ ءِ شک ءَ یک رمسے نبشتگ چوش ہم بیت کنت کہ آ دگہ مردم رند ءَ کش ءَ کل کنَگ بیتگ اَنت۔ اے گپ ھم نی گیش اِتگ ءُ راست بیتَگ کہ سالونک، بانور ءُ دیمدار ءِ ادیرہ شے بلال نہ انت۔ اے گپ ھم تَچک بیتَگ ادیرہ پہ امیر کمبر ءَ ھوت میران ءَ جوڑ کنائینتگ۔“
سالونک، بانور ءُ دیمدار اگاں گْوادر ءِ بُنکی مردم بیتگاں گوڑا الم ءَ آیاں سیاد ءُ وارث ھم بیت۔ چہ پٹ ءُ پول کنوکاں گیشتر رپتگینانی سیاد ءُ وارث وتی رپتگینانی مانشاں پجا کار اَنت؟۔
یا واہ اے ادیرہ ءِ باروا ”آرکیالوجسٹ“ وتی opinion ءَ دات کن اَنت کہ سالونک بانور ءِ ادیرہ ءِ گپ کجام ھد ءَ تک راست اِنت؟۔
Comments
Post a Comment