دشت ءِ کوھنیں آپ واری ھوٹگ
دشت ءِ کوھنیں آپ واری ھوٹگ
عبدالحلیم
مکران ءِ ھند ءُ دمگاں بازے کوھنیں ءُ کدیمی جاگہ ھست اَنت کہ اشانی تھا یکّے کسَر ڈَنُک ءَ باز کوھنیں آپ واری ھوٹگے ھم ھست۔ اے ھوٹگ یَک ھدائی بندگے کہ نام ئے میا مَلّگ بوتگ ہمائی ءَ وتی وھد ءَ جوڈ کُتگ۔ مِیا ملَگ چونائی ءَ سیادی ءَ منی بُن پِیرُک بیت۔ میّا ملّگ ءِ جوڈ کُتگیں اے ھوٹگ ءَ کساس دو سد سال بیت۔ ھوٹگ دشت ضلع کیچ ءِ کَسر ڈَنُک بازار ءِ دَمگ ءَ اِنت کہ ھمے جاگہ ءَ گَرگانڈ گُش اَنت۔ پمشکہ اے ھوٹگ ءِ نام چہ گَرگانڈ ءَ مشھور اِنت۔
اے ھوٹگ گَلگانی راہ ءِ سر ءَ جوڈ کَنگ بیتگ۔ آ زمانگ ءَ چوش کہ گاڈی ءُ موٹرانی سَر ءَ سپر کنگءِ ھچ پیمیں آسراتی نہ بُوتگ پمیشکہ مَردماں اُشتر ءِ سر ءَ سپر کُتگ ءُ گَلگیاں گیشتر گرگانڈ ءِ راہ کار مَرز کُتگ۔زگریانی کوہ ءِ مُراد ءَ رؤکیں کاروان ھم چَمِدا گوستگ ءُ شُتگ اَنت۔ ھمے کاروانی اگاں شَپ کَپتگ اَنت یا دم ءِ بالا کنَگ لوٹ اِتگ ئے گُڑا ھمے ھوٹگ آھانی بُنجَل بوتگ بزاں یک ھسابے ءَ گَلگیانی منزلے بیتگ۔ آ زمانگ ءَ واجہ میا مَلّگ ءُ آئی ءِ کہول ءِ مَردم وت ھم ھمے ھوٹگ ءِ ھاک ءِ سر ءَ جھمِنند بیتگ اَنت۔ گلک کہ اتکگ اَنت گڑا میا مَلّگ ءَ آپ ءُ تام کُتگ اَنت۔ اگاں کسے ءَ شپ ءَ جَلّ اِتگ گُڑا مھمان ئے داشتگ ءُ شپ ءَ پہ گندل ئے کُتگ۔ ھمے کدیمی ھوٹگ مرچی ھم برجاہ اِنت۔ میا مَلّگ ءِ نماسگ ھمک سال ھمے ھوٹگ ءَ روپ اَنت ءُ سپا کن اَنت۔ ھمے زیتاں ھوٹگ پدا ھَرِن کَنگ بیتگ۔ اگاں ھَورانی موسم بہ بیت تہ اے ھوٹگ تاں دیراں پہ آپ ءِ ورگ ءَ کار مَرز کَنگ بیت۔پرچاکہ اے باز آپ دار ایت ءُ داں مزنیں مُدّتے ءَ ھُشک نہ بیت۔ بلے بژن کہ چہ ڈُکّال ءُ بے ھَوری ءَ اے شاھی ھوٹگ ھم مرچاں ھُشک اِنت۔
بلے میا مَلگ ءِ نُماسگ واجہ حاجی علی بکش کہ کَسرڈَنُک ءِ جھمِنند اِنت اے وھد ءَ پہ کار ءُ روزگار ءَ دبئی اِنت آئی ءَ وتی پِت ءُ پیروکانی ربیت برجاہ داشتگ ءُ اے ھوٹگ ءَ بار گِرگ نئیل ایت۔ مرچی ھم اے ھوٹگ کَسر ڈَنُک بازار ءِ مَردمانی تُن ءِ پروشگ ءَ یک بلاھیں وسیلگے ءِ بستار ءَ داریت۔ اگاں ھور مہ بیت گُڑا مَردم پہ ورگی آپ ءَ تکانسر بنت کہ انو بے ھوری ءَ تکانسراَنت۔
ھوٹگ ءِ سر ءَ یک کہورے ھم ھست کہ اے کہور باز کوھنیں درچکے گوشگ بیت کہ میا مَلّگ ءَ چہ ساری اِنت۔ مَردم رواَنت ءُ گار بنت بلے آھانی نیکی برجاہ مان اَنت ۔ میا مَلگ ءِ زمانگ ءَ جوڈ کُتگیں اے ھوٹگ ءَ نوکیں زمانگ ءَ گَلگ ءُ کاروانی وا نیا اَنت بلے وھدے کہ چہ آپ ءَ سر ریچ بیت گُڑا ھما دمگ ءِ لَس مھلوک وتی تُنّ ءَ چمے ھوٹگ ءِ آپ ءَ پروش اَنت۔
گرگانڈ ءِ ھوٹگ ءِ زید ءُ ندارگ وشّ اِنت پمیشکہ مرچیگیں زمانگ ءَ پہ پکنِک پوائنٹے ءِ ھساب ءَ ھم کار مَرز کَنگ بئیگ ءَ اِنت۔
Comments
Post a Comment