اُستاد عبدالمجید گْوادری ءِ سالروچ

عبدالحلیم حیاتان 

زندگی چی یے یک سپر جاھے

منزلے گونڈیں سُھب ءُ بیگاھے

ھاتر ءَ جم کن لَڈّ مجید باراں

آکرت پر پُلّیں واب جاھے

اَلوتی برمشے ءَ

منا گُوشتگ 

پردہ پوشے

تئی ودار اِنت 

23 فروری بلوچی زُبان ءِ نامداریں شاعر اُستاد عبدالمجید گْوادری ءِ شَش می سالروچ اِنت۔ اُستاد عبدالمجید گْوادری 1937 ءَ گَنجیں گْوادر ءَ ودی بُوتگ ءُ 23 فروری 2018 ءَ آئی ءَ اے کوڈھیں دُگنیا یلہ کُرتَگ۔ 

پہ بلوچی زُبان ءِھزمت ءَ اُستاد عبدالمجید گْوادری ءِ کِرد جوان لیکگ بیت۔ اُستاد عبدالمجید گْوادری بلوچی راجی سوت “ما چُک اِیں بلوچانی” ءِ پربندوک اِنت کہ داں مَرچی ہم اے سوت ءَ بلوچ پہ وت پھر ءُ شانے سرپد بنت۔ اے سوت اُستاد عبدالمجید گْوادری ءَ پہ جوان کما تَگ کہ اے سوت ءِ تھا بلوچ ءِ بھادری ءُ میار جَلی ءِ درستیں رَنگ مان اَنت۔

چُک اِیں بلوچانی ما چکّ اِیں بلوچانی

ما نان دَئے ءُ داد بکش اِیں 

ما سر دَے ءُ نام کش اِیں 

ما ھونی میار جَل اِیں 

ما دیم ءَ رویں بیرانی

ما گیرت ءِ شیر مِتکگ

ماں ساھگ ءَ زَھمانی

ھون پَٹ اِیت چہ مئے چمّاں 

ما کومیں شھیدانی 

چُک اِیں بلوچَانی

ما چُک اِیں بلوچانی

اُستاد عبدالمجید گْوادری کار ءُ کَسب  یَک اُستاد بزاں کہ Teacher ءِ بِستار ءَ بِندات کُرتگ پمشکہ واجہ ءَ اُستاد گُوشَگ بیت۔ اُستاد عبدالمجید گْوادری 60 دیک ءَ وانینَگ ءِ پِڑ یلہ کَنت ءُ مَشکت عمان ءَ رُوت۔ مَشکت عمان ءَ ہم آ اُستاد ءِ بستار ءَ کار کَنت۔ مَشکت عمان ءِ پُوج ءَ واجہ انگریزی زُبان وانینیت ءُ انگریزی ءِ پَجّی ءَ بلوچی زُبان ھم وانینیت۔ 

اُستاد عبدالمجید گْوادری چہ وتی دیار ءُ وتن ءَ دور بیت بلے آئی ءِ گوں وتی زمین ءُ زُبان ءَ عشق مُھکم بیت۔ وتی شعری ساچِشت ءَ یک شلہ برجاہ داریت ءُ بلوچی زُبان ءِ ھِزمت ءَ جاری کَنت۔ اُستاد عبدالمجید گْوادری ءِ شعری ساچِشت یا کہ درشانداب سَک باز اَرزِشت داریت۔ اُستاد ءِ شاعری ءِ تھا جُتا جُتا اِیں رَنگ گِندگ ءَ کئیت۔ وتی سرڈگار ءِ گوں مھر بہ بیت یا کہ  پاکسمائی ( صوفی اِزم) ءِ رَنگ اُستاد ءِ شاعری ھرچ وَڑیں ساچِشت ءِ دَرانگازی ءَ کَنت۔  

گُلیں رُژنائی ءِ مستاگ ءَ بیار اِیت

ھما بام ءِ بلوچ راج ءَ ودار اِنت

شیھ ءُ مُلاّ ءُ میر ءُ ڈُنگیں راھشون

چرے پولِنگاں ھرکس نی شزار اِنت

مجید! ایروپے کئیت زالم نہ مان اِیت

ھما سّیہ گُوات ءِ تّوپان ءِ توار اِنت

اُستاد عبدالمجید گْوادری ءِ بازیں شعری دپتر چُش کہ گلیں باندات، نپتیں سگار، ترانج، سو سنیں گیوار، شَند، جزءُ تَلمل، ریدگیں ریز، شَدر ءُ اَرجَل، لاس ءُ الماس، ابدمان، اِناش، اَبرم، زَیچان ، اِیرلہ، ھَوات، المباتیر اور ماھلنج ءِ شراب ھانہ چھاپ ءُ شِنگ کَنگ بِیتگ اَنت۔ اے شعری دپتر پہ بلوچی زُبان ءُ ادب ءِ دیمرئی باز اِرزشت دار اَنت۔ 

اُستاد عبدالمجید گْوادری ھرچ دُور ءُ باریگ ءِ شاعر زانگ بیت۔ اّستاد ءِ شعری ساچِشت وتی تھا رھبری،  وتن ءَ گوں عشق ءُ صوفی اِزم ءِ جوانیں رَنگ ءُ دُروشم زانگ بیت۔ اُستاد عبدالمجید گْوادری ءَ پہ بلوچی زُبان ءُ ادب ءِ واست ءَ بے مَٹّیں ھِزمت کُرتَگ بلے بَژن اِنت کہ واجہ ءِ سالروچ بیتواری ءَ گوازان اَنت۔

• مجید ءِ شَیر بنت آیات راج ءِ

”گُلیں باندات“ ءَ پُسّگ دَربر اَنت اِنت