گْوادر اَئید میڑہ

 

عبدالحلیم حیاتان 

گْوادر ءَ اَئید میڑہ ءِ ربئیت چو مدامی سالانی وَڈ ءَ برجاہ اِنت۔ کسانیں اَئید بہ بیت یا مزنیں اَئید، گْوادر ءَ اَئید ءِ دومی روچ ءَ کوہ باتیل ءَ میڑہ جمینگ بیت۔ اِمبری سال ءَ ھم کسانیں ائید ءِ دومی روچ ءَ کوہ باتیل ءَ ائید میڑہ برجم دارگ بیتگ۔ امبری ائید میڑہ بلوچی زبان ءِ کواس، لبزانت، شاعر، ادیب، زبان زانت، بلوچی زبان ءِ اولی لبز بلد (ڈکشنری) بزاں کہ "سید گنج" جوڈ کنوک سید ظہورشاہ ھاشمی ءِ نام ءَ ایر کنَگ بیتگ۔ 

گْوادر ءَ ائید میڑہ ءِ ربئیت کوھن اِنت۔ بلے اِشی ءِ نوکیں رنگ ءَ دروشم 1998 ءَ چی بندات کَنگ بیتگ۔ پہ اَئید میڑہ ءِ بندات کَنگ ءِ واست ءَ 1998 ءَ گْوادر ءِ سْیاسی چاگردی جھد کار ھدا مُرزی ڈاکٹر عبدالعزیز ءُ آئی سنگت یونس حسین، قادر جان ءُ انور عیسی ءَ یک کمیٹی ءَ اڈ دات کہ اشی ءِ نام ائید میڑہ کمیٹی ایر کَنگ بیت پد ءَ ہمے کمیٹی ءِ چیر دستی ءَ ائید میڑہ ءِ ربئیت برجاہ دارگ بیت کہ تنیگ ءَ اے ربئیت نہ پروشتگ۔ مرچاں اَئید میڑہ ءِ آرگنائزر خیرجان آرٹ اکیڈمی گْوادر اِنت۔ خیر جان آرٹ اکیڈمی اَئید میڑہ ءَ پہ جْوانیں انداز ءَ برجاہ دارگ اِنت۔ 

اَئید ءِ شادھانی روچ ءَ کوہ باتیل گوں ائید میڑہ ءِ رنگ ءَ جلواناک بیت۔ میڑہ ءِ درگت ءَ زیمری پروگرام پیش دارگ ءَ چی ابید ڈرامہ، خاکہ ءُ انعامی پروگرام اڈ دیگ بنت۔ اشی ءَ چی ابید چُکانی میان ءَ وڑ وڑیں مقابلہ کَنگ بیت گوں ہمے پروگرام ءَ کسان چہ مزن entertain بنت۔ ہر نیمگ ءَ شات کامی ءُ وشنُودی ءِ تالان بیت۔ 

اَئید میڑہ پہ ایوک ءَ گْوادر ءِ مھلوک ءِ ائیدانی وشیانی میڑہ نہ اِنت۔ بلکیں مَکُّران ءِ دگہ دمگانی مھلوک اَئید ءِ دومی روچ ءَ گْوادر ءَ کا ینت ءُ میڑہ ءَ چی وشنُود بنت۔

اَئید میڑہ ءَ بلوچی زبان ءِ نامئیں گْوَشِندہ کہ اِشانی تھا خلیل سھرابی، نسیم علی، کامران داد، انور رحیم، سمیر رحیم، محمد علی ھاتم ءُ فرھاد حسین ھوار بیتگاں گوں وتی وشیں توار ءَ سید ظہور شاہ ھاشمی ءِ دُریں گالاں جتگ ءُ اَئید میڑہ دو میڑہ کُتگ۔