سید ظہورشاہ ھاشمی
عبدالحلیم حیاتان
21 اپریل بلوچی زبان ءِ نامداریں شاعر، پَٹ ءُ پُولکار ءُ زبان زانت واجہ سید ظہورشاہ ھاشمی ءِ 97 می بوتن ءِ روچ اِنت۔ سید ظہورشاہ ھاشمی 21 اپریل 1926 ءَ گْوادر ءَ ودی بیتگ ءُ 4 مارچ 1978 ءَ کراچی ءَ بیران بیتگ۔
پہ بلوچی زبان ءِ دیمرئی ءِ ھاتر ءَ سید ظہورشاہ ھاشمی ءَ بے مٹ ءُ بے دوروریں کار کُرتگ۔ سید ظہورشاہ ہاشمی وتی نمدیانی ءِ وانگی "سید نمدی" ءِ تھا واجہ مپتاھی بزاں کہ رسول بخش مپتاھی ءِ نام ءَ نمدی ءِ نبیستگ کہ ہمے نمدی ءِ تھا سید نبشتہ کنت کہ،
"ھو! من نادراھاں کہ نادر ھجاہ ءَ یاں۔ بلے من اے نادراھی ءِ باز منت واراں پرچاکہ ھمے نادر ھجاہ ءَ مَن پہ بلوچی زبان ءَ پہ وتی وس ءَ سر جتگ۔ "سِستگیں دستونک" ھمے نادر ھجاہ ءَ سرجم کُرتگ۔ ابید چہ ایشی ءَ وتی لچّھانی سے 3 دپتر ھم سرجم کُرتگ۔ انگروءُ ترونگل، برتکگیں بیر، تراپکنیں ترمپ۔ ابید چی اشی ءَ پہ بلوچی ءِ راست نبیسّگ ءُ دگہ بلوچی بُنگیجی پہ رُستگیناں ھم جریدہ اِنت۔ چہ اِے ششیں وانگیاں ابید کلا اللہ ءِ یک بھرے (جزءعّم) ھم بلوچی کُرتگ ءُ سرجم اِنت۔ بلے چہ اِے درستاں انگت دگہ مستریں کارے "سید گنج" اِنت۔ بزاں بلوچی بزانت بلد (ڈکشنری) اِنت کہ من ءَ گیشتر گُمان اِنت کہ چی ایشی ءِ سرجم بیگ ءَ پیسر من ءَ ساہ دروہ اِیت پرچاکہ منے روچاں من وت ءَ زندگین ءَ شمار کنگ ءَ نیاں".
اے نمدی ءَ چی زانگ بیت کہ سید ءَ پہ بلوچی ءَ نبیتگ اِیں کار کُرتگ۔ سید ءَ نادراھی حالت ءَ ھم بلوچی ءِ گم پِر بیتَگ ءُ اِشی ءِ سر ءَ کار کُرتگ دانکہ بلوچی گار مہ بیت ءُ بلوچی زبان ءُ ادب دیمرئی بکن اَنت۔
سید ظہورشاہ ھاشمی شاعری وَت یک جتائیں اسلوب ءِ واھند اِنت کہ اِشی ءِ تھا فلسفیانہ شاعری ءِ رنگ ءُ دروشم ھم گِندگ کئیت۔ سید ءَ وتی شیرانی تھا آؤکیں وھد ءِ پیشنگوئی کُرتگ۔ وتی زند ءَ سید گْوادر ءِ باروا وتی ھیال ءُ لیکھاں اے وَڑ دَرشان کنت:
بے سریں راج ءُ بے سریں سودا
جھندم چہ بادگیر ءَ کاپر شت
آتکگ باریگ لج بریں زر ءِ
دوستی ءُ مھر ءِ دور آسر شت
شال پیسر سگار ھرجان اَت
دیناں بے سیت ءِ گنجیں گوادر شت
راستی ءِ بام ءَ جورکاں داتگ
مال شت ملک ءُ مھتریں سر شت
وژدلیں جارے کپتگ مرت سید
موتک دستونکاں راھدربر شت
اے دھر ءَ گْوادر گوں کُجام جاورانی دیم پان اِنت اِشی ءَ ھرکَس سئیگ ءُ سرپَد اِنت۔ بلے سید ءَ وتی زِند ءَ گْوادر ءِ آؤکیں جاورانی نقشہ وتی شیر ءِ تھا درانگاز کُتگ ءُ مردم شیوار ءَ کُتگ آں کہ گْوادر چون بیت۔ سید ءِ اے شیر گْوادر ءِ انیگ اِیں جاورانی سد در سد ترجمانی کَنت۔
سید ظہورشاہ ھاشمی ءِ شاعری بہ بیت یا کہ آئی پٹ ءُ پولی کار اے پہ بلوچی زبان ءُ ادب ءَ ھزانگ اَنت کہ چرشی ءَ بلوچی زبان ءُ ادب تنیگ ءَ برجاہ اِنت ءُ بلوچی زبان ءُ ادب دیمرئی کنان اِنت۔ سید شُناسی پہ بلوچی زبان ءُ ادب ءَ ھژدری اِنت۔ سید شُناسی بلوچی زبان ءُ ادب ءِ مانزمان اِنت۔
دانکہ بلوچی زبان ءُ ادب برجاہ بنت گوڑا سید ہم یات کَنگ بیت۔
گال نام منی نام تئی نام ھُدا ءِ
بے گال ءَ من ءُ تو ءُ ھُدا وند مجاں گار
بے گال ءَ نہ بیت گُپت نہ بیت گُپت نہ بیت کِرد
گال اَنت کہ گُپتار بنت گُپتار بنت کِردار
گال انگر ءُ گال تُرونگل ءُ گال بِرتکگیں بِیر اَنت
گال تراپکنیں ترمپ سِچکانیں سسا ءُ گُل ءُ گُلکار
سید ظہور شاہ ہاشمی ءِ تنیگ ءَ 18 وانگی چاپ بیتگ کہ اِشانی نام اے وڑ اَنت۔
Comments
Post a Comment