سوتی ماسی زیبُل

 عبدالحلیم حیاتان 

ماسی زیبُل سوتی گْوادر ءِ یک نام داریں جنینیں سوتی یے بیتگ۔ ماسی زیبُل ءَ سوت جنگ چہ کدیم زمانگ ءَ بندات کُتگ۔ پیش ءَ کہ گْوادر ءِ ہرچ لوگ ءَ آروسی دیوان جم  اتگ اَنت گُڑا ماسی زیبُل ہمے دیوانانی براہ بیتگ کہ اود ءَ ماسی زیبُل ءَ گوں وتی وش گُٹّی ءَ سوت جَتگ ءُ چہ آئی ءِ وش الھانیں آواز ءَ بلوچی ساز ءُ آواز ءِ وَش تبیں زیمر شِنگ ءُ تالان بیتگ۔ 

"خیر جان خیرُل وتی فیس بک وال ءَ نبشتہ کَنت کہ ماسی زیبُل ءَ سوت گُوشی چہ وتی مات ءَ دَربُرتگ۔ زیبُل وتی ورنائی ءَ شاہ ایران ءِ چُک ءِ سالگرہ بزاں کہ بوتن روچ ءِ دَرگت ءَ داں ایران ءَ شُتگ ءُ سوت جَتگ"۔

ماسی زیبُل چہ چماں آجز بیتگ بلے ماسی زیبُل ءَ وتی اے آجزی وتی نیزگاری جوڈ نہ کُرتگ بلکیں سوت جتگ ءُ وتی اِمروز گوازینتگ۔ گْوادر ءِ چُشیں میتگ ءُ لوگ نیست کہ ماسی زیبُل آروسی دیوانانی براہ نہ بیتگ۔ ماسی زیبُل ءَ وتی زمانگ ءَ آروسانی ٹیمب ءَ  جنین آدمانی دیوان  ءَ سوت جتگ ءُ چہ ماسی زیبُل سوتاں دیوان وَشنود بیتگ اَنت۔    

ماسی زیبُل ءِ یک سوت یے کہ "ووٹ ءَ بِدیت آں عابد ءَ عابد شمارا آپ دنت" سک نام دار بیتگ ءُ ہمے سوت گْوادر ءِ ہرچ دمک ءُ ہلکاں جکس اِتَگ۔ اے ہما زمانگ اِنت کہ بلدیہ گْوادر ءِ گْوَستگیں چیئرمین عابد رحیم سہرابی ءَ نود ءِ دھک ءَ گوں مَٹّ ءِ نشان ءَ گچین کاری آں بہر زُرتگ اَت۔ 

ماسی زیبُل بلوچی زیمر ءَ چوشیں بلائیں نام ءِ نہ بیتگ بلے گْوادر ءِ تھا یک نامے بیتگ ھاس کر آروسی شادھاں ماسی زیبُل ءَ وتی ازم پہ شری ءِ سر ءَ پیش داشتگ۔ ماسی زیبُل 2000 ءَ جنین آدمانی سیٹ ءِ سر ءَ بلدیاتی گچین کاری ءَ جنینانی جھگیر بزاں کہ کونسلر ہم جوڈ بیتگ۔ ماسی زیبُل ءَ چہ گْوادر ءَ چماں چہ آجز بوکئیں اولی جنینیں کونسلر جوڈ بوھگ ءِ اعزاز وتی نام ءَ کُتگ۔ 

ماسی زیبُل ءِ سْیادی چہ دریاوردانی میتگ ملا کریم بخش وارڑ ءَ چہ بیتگ۔ ماسی زیبُل ءِ اُمر کساس 90 ءَ چی بُرز بیتگ۔ سہ شمبے روچ رمس 21 مارچ ءَ ماسی زیبُل ءَ اے کوڑیں دگنیا یلہ دات ءُ وتی مُھکیمی جاگہ شُت۔